Sunday November 29, 2020  |    | 

महिला हिंसा अन्त्यका लागि प्रदेश र स्थानीय तहसँगको सहकार्यमा जोड: मन्त्री पार्वत गुरुङ

2020 May 30
IMG
काठमाण्डौ, जेठ १६
महिला, बालबालिका तथा ज्येष्ठ नागरिकमन्त्री पार्वत गुरुङले महिला हिंसा अन्त्य गर्ने प्रतिवद्धता व्यक्त गर्नु भएको छ ।

मन्त्री गुरुङले महिला माथि हुने सबै प्रकारको हिंसा अन्त्य गर्न सरकारले आवश्यक नीति तथा कार्यक्रम र बजेटको व्यवस्था गरेको पनि स्पष्ट पार्नु भयो । शुक्रबार ललितपुरको पुल्चोकस्थित मन्त्री निवासमा आयोजित ‘दोस्रो राष्ट्रिय महिला अधिकार दिवसको अवसरमा आयोजित ‘भर्चुअल’ बैठकमा बोल्दै उहाँले समाजमा विद्यमान विकृति, विसंगति र सबै प्रकारको हिंसा अन्त्यका लागि आवश्यक कार्यक्रम तय गरिसकिएको बताउनु भयो ।

‘हिंसामुक्त नेपाल निर्माण गर्न सरकारले आवश्यक सबै व्यवस्था मिलाएको छ,’ मन्त्री गुरुङले भन्नु भयो त्यसका लागि आवश्यक कार्यक्रम, नीति र बजेटको व्यवस्था मिलाइएको छ ।’ उहाँले लकडाउनका बेला हुने महिला हिंसा अन्त्यका लागि प्रदेश र स्थानीय तहसँग सहकार्यमा जोड दिइएको पनि स्मरण गराउनु भयो । मन्त्री गुरुङले महिला हिंसा अन्त्यका लागि पुरुषहरुलाई सचेत बनाउन अभियान नै संचालन गर्ने घोषणा पनि गर्नु भयो । कोरोना भाइरसका बेला महिला हत्या र हिंसाजन्य अपराधिक घटना घटेकोमा विश्व समूदायनै चिन्तित रहेको उल्लेख गर्दै त्यसो हुन नदिन सरकार प्रतिवद्ध रहेको पनि मन्त्री गुरुङको भनाई थियो ।

मन्त्री गुरुङले महिला हिंसा अन्त्यका लागि सरकारले महिलाहरुलाई उद्यमशील बनाउन आगामी आर्थिक वर्षको बजेट, नीति तथा कार्यक्रममा ‘महिला उद्यमशीलता सहजीकरण केन्द्र’ स्थापना गर्ने तय गरिएको पनि बताउनु भयो ।

बैठकमा बोल्दै नेपाली काँग्रेसका नेता एवम् पूर्वमन्त्री एनपी साउदले गाउँगाउँमा महिला हिंसा हुन नदिन सरकारको गम्भिर ध्यानाकर्षण गराउनु भयो । महिला, बालबालिका तथा ज्येष्ठ नागरिक मन्त्रालयकी सचिव यामकुमारी खतिवडाले महिला हिंसाको घटना हुन नदिन सरकारले पुरुष सहभागितामा जोड दिने गरी आवश्यक योजना बनाएको बताउनु भएको थियो ।

करिव ३ सय बढि सहभागी सो बैठकमा संघीय संसदका सांसदहरु, प्रदेशका सामाजिक विकासमन्त्रीहरु, विज्ञहरुलगायतले महिला हिंसा अन्त्यका लागि सरकारले नीति तथा कार्यक्रम र बजेटको व्यवस्था गरेकोमा आभार व्यक्त गर्नु भएको थियो ।

कमेन्ट गर्नुहोस्